ரோஜா முத்தையா ஆராய்ச்சி நூலகத்தின் நோக்கங்களில் முக்கியமானது, அடுத்த தலைமுறையினருக்காக அதன் சேகரிப்புகளைப் பாதுகாப்பதாகும். இத்துடன், நூலகம் கவனம் செலுத்தும் மற்றொரு முக்கிய அம்சங்களில் ஒன்று, மாற்று வடிவங்களில் ஆவணங்களைப் பாதுகாப்பதாகும். நூலகம், அதன் சேகரிப்புகளை நுண்படம் மூலமும் எண்ணிமமாக்குதல் மூலமும் முறையாக ஆவணப்படுத்தி பாதுகாத்து வருகிறது. ஆவணமாக்கலில் நுண்பட முறை நிறுத்தப்பட்டு, எண்ணிமமாக்குதல் முறை மேற்கொள்ளப்படுவதால், அதிலும், நூலகம் ஆவணங்களைப் பாதுகாக்க, பல்வேறு அதிநவீனக் கருவிகளைப் பயன்படுத்துகிறது. இத்துடன், நூலகத்தில் நுண்படச் சேகரிப்புகளைப் பாதுகாக்க 24 மணிநேரமும் 35% ஈரப்பதம், 18° செல்சியஸ் வெப்பநிலை கொண்ட பிரத்யேக சேமிப்பகத்துடன் கூடிய வசதியும் உள்ளது. உலகத்தரத்தில் சிறந்த நடைமுறையாக மேற்கொள்ளப்படும் மெத்திலீன் ப்ளூ டெஸ்ட் போன்ற தரத்தில் இந்நூலகத்தின் நுண்படச் சேகரிப்பகம் அமைந்துள்ளது. மேலும், நூலகம் கையெழுத்துப் பிரதிகளை நவீன தன்மையில் மறுசீரமைக்கும் முறையிலும் ஈடுபட்டுள்ளது. கணிதமேதை சீனிவாச ராமானுஜனின் கையெழுத்துப் பிரதிகளின் மறுசீரமைப்பும் திருக்குறளின் முதல் பதிப்பும் இந்தத் துறையில் நூலகத்தின் நிபுணத்துவத்திற்கு சான்றாகும்.